Ministru Manetelu aprezenta progresu implementasaun sistema kabu sub-mariñu súl Timor-Leste no rede fibra ótika terrestre nasionál
Dili, 01 Jullu 2026 - S.E. Ministru Transportes no Komunikasoins, Eng. Miguel Marques Gonçalves Manetelu, partisipa reuniaun Konsellu Ministru Kuarta ne’e iha Pálasiu Governu Dili.
Iha reuniaun ne’e S.E. Ministru Manetelu halo aprezentasaun, kona-ba progresu ne’ebé alkansa ona iha implementasaun Sistema Kabu Submarinu Súl Timor-Leste (TLSSC, sigla iha lain Inglés) no rede fibra ótika terrestre nasionál.
Aprezentasaun ne’e relata kona-ba finalizasaun instalasaun no teste ba fiu submarinu internasionál, ne’ebé deklara tiha ona prontu ba operasaun komersiál, nune’e mós kriasaun empreza públika Cabos de Timor-Leste, EP, ne’ebé responsavel ba jestaun infraestrutura estratéjika ne’e no progresu ne’ebé hetan ona iha nia operasionalizasaun.
Aprezenta mós asaun prinsipál sira ne’ebé hala’o daudaun ka programadu (programa ona), ne’ebé inklui preparasaun ba inísiu operasaun komersiál, reforsa kapasidade operasionál empreza nian, aumentu redundánsia ligasaun internasionál, hametin siberseguransa, no mós expansaun rede fibra ótika nasionál, ho objetivu atu hametin konektividade dijitál nasionál no impulsiona ekonomia dijitál.
