Prezidente, J. Ramos-Horta, deklara TL-Indonézia susesu transforma pasadu difísil sai modelu globál hodi kontinua hametin relasaun di'ak, amizade, no kooperasaun rejionál.
Dili, 30 Outubru 2026 – Ministru Transportes no Komunikasaun, Eng. Miguel Marques Gonçalves Manetelu akompaña Prezidente Repúblika, José Ramos-Horta hamutuk ho diplomata no ofisiál sira husi Embaixada Indonézia iha Dili, marka prezensa iha resepsaun diplomatiku iha ambitu hodi selebra Aniversáriu Independénsia Repúblika Indonézia nian ba dala-81 iha Faról Dili.
Iha resepsaun ne’e marka mós prezensa husi Ministru Interior, Francisco Guterres, Vise Minsitru Asuntu ASEAN, Milena Rangel, no Prokurador Jeral Republika (PJR), Nelson de Carvalho.
Iha selebrasaun ne'e, Xefe Estadu akompaña husi Enkaregadu Négosiu (Chargé d'Affaires) Embaixada Indonézia nian, Raden Sakunto Paksi, hamutuk ho korpu diplomátiku no komunidade indonézia ne'ebé hela iha Timor-Leste.
Prezensa Xefe Estadu Timor-Leste nian iha selebrasaun ne'e sai hanesan jestu diplomátiku ne'ebé hodi hametin liu tan relasaun ne’ebé metin, respeitu mútua, no amizade bilaterál ne'ebé forte entre Timor-Leste no Indonézia hanesan nasaun viziñu.
Prezidente Ramos-Horta destaka transformasaun estraordinária ne'ebé akontese iha relasaun bilaterál entre Timor-Leste no Indonézia. Husi pasadu ida ne'ebé difísil no ho desafiu bo'ot, nasaun viziñu rua ne'e susesu hodi dezenvolve relasaun ne'e sai modelu globál ba parseria, respeitu mutuál, no kooperasaun regionál ne'ebé metin.
