PM Xanana husu entidade hotu iha Munisípiu Lautem hametin unidade hodi nune'e prepara simu podér lokál
Dili, 17 Marsu 2026 – S.E Primeiru-Ministru Kayrala Xanana Gusmão halao vizita ofisiál ba munisípiu Lautem Segunda ohin, iha vizita ne’e akompaña mós hosi S.E. Ministru Transportes no Komunikasaun, Eng. Miguel Marques Gonçalves Manetelu no membru governu balu.
Xefe Governu husu ba Autoridade munisípiu Lautem hahú hosi PAM,APA, xefe suku sira no intelektual lautem oan sira atu tur hamutuk hodi diskuti povu lautem nia futuru.
“Imi nia servisu laos atu manan osan imi nia servisu atu tau matan ba lautem no ba povu lautem ne’e duni kordenasaun importante tebes ko’alia ba malu lalika dehan ha’u mak matenek ha’u mak iha ne’eba, imi ajuda malu, servisu nu’udar ekipa, imi buka reuni ko’alai ba malu kona-ba difikuldade saida deit maka munisipiu hasoru, hodi nune’e prepara an atu bele sai governu lokal iha munisipiu lautem. Tanba ne’e asembleia munisipál sei buka tuir imi halo saida tanba ne’e ita iha estadu tun mai kraik, imi mak halo imi mak tenki hatudu ba povu ida ne’e, lalika hatudu ba ema seluk katak imi hadomi rai ida ne’e imi hadomi povu ida ne’e ne’ebe administradór postu sira, xefe suku sira koalia ba malu”PM Xanana husu.
Iha sorin seluk Xefe suku Bauro, Xefe suku Bauro Florindo Miranda preokupa tebes ho liña internet iha nia suku no husu Ministériu Transportes no Komunikasaun atu hadia liña internet iha sira nia suku.
“Hau nia rekomendasaun ba ministériu transportes no komunikasaun atu hare ba liña internet iha ami nia munípiu lautem tanba iha area remotas ami atu asesu liña internet susar lahalimar”dehan Xefe suku Bauro Florindo Miranda
Hatan ba preokupasaun hosi Xefe suku Bauro Florindo Miranda, Ministru Manete hatete problema liña internete laos de’it iha suku Bauro maibé iha teritoriu nasional hasoru problema hirak ne’e maibé governu sei buka meiu hodi rezolve iha tinan ne’e.
“Ohin kona-ba internet ha’u hanoin laos de’it suku Bauro kuaze area remotas sira iha situasaun ne’ebe hanesan maibé atu informa katak ho problema ida internet maka governu deside halo investimentu ba kabu submarinu fibra otika, atu informa katak projetu ne’e konklui agóra ita halo teste hela internet sira ne’ebé mak uja hela iha servisu publiku tantu nasional mai too munisípiu internet ne’ebé ohin ita uja ne mai hosi kabu submarinu, ita espera katak antes fulan ida ne remata ou tarde liu primeira semana fulan abril ita bele lansa ready for service” Ministru Manetelu responde’’
Primeiru-Ministru Kay Rala Xanana Gusmão afirma desentralizasaun poder lokal laos atu ukun maibe atu servi, ne'e duni husu ba intelektual oan sira husi munisipiu lautem atu kontinua dezenvolve potensial sira iha munisipiu hodi nune'e ba futuru lautem oan sira rasik mak sei sai nain ba dezenvolvimentu
