Prezensa Balkaun úniku atu hakbesik prestasaun servisu ba sidadaun sira
Bobonaro, 12 Marsu 2026 – S.E. Ministru Transportes no Komunikasaun, Eng. Miguel Marques Gonçalves Manetelu, partisipa inagurasaun edifísiu Balkaun Úniku (BU) iha Postu Administrativu Maliana, munisípiu Bobonaro.
Edifisiu Balkaun Úniku ne’e inaugural hosi S.E. Primeiru-Ministru Kay Rala Xanana Gusmão kinta-feira iha Postu Administrativu Maliana, munisípiu Bobonaro.
Balkaun Úniku nia prezensa atu hakbesik prestasaun servisu bá sidadaun sira, moderniza no simplifika servisu atendimentu bá públiku ho lalais no fásil, no bele promove transparénsia hodi governasaun di'ak besik-liu bá povu.
Balkaun Úniku ne'e estabelese bá da-sia iha territóriu, liu-liu iha Bobonaro neʼebé mai ho ekipamentu foun no lori servisu governamentál sira atu trata Billete Identidade (BI), Pasaporte, no Sertidaun Kriminál hodi hamenus tempu, kustu no todan bá viazen sidadaun sira ne'ebé hela do’ok hosi kapitál.
S.E. Ministru Administrasaun Estatál (MAE), Tomás do Rosário Cabral hatete Balkaun úniku ne’e estabelese uluk iha munisípiu Manatuto, Baucau, Ataúro, Aileu, Manufahi, Covalima no Oecusse, remata ho Bobonaro, Ermera no Lautém sei inaugura iha semana oin. Sira ne’ebé sei iha prosesu konstrusaun maka munisípiu Viqueque ho Ainaro.
Balkaun Úniku maka sistema ida integradu, servisu hamutuk ho liña ministeriál sira liu-liu Ministériu Justisa.
Prosesu pasaporte halo iha Balkaun Úniku ne’e, maibé imprime iha Dili tanba Pasaporte hanesan dokumentu ida ofisiál tebtebes, nia sentrál iha Serve ne’ebé iha Ministériu Justisa. Maibé dokumentu seluk prodús iha Balkaun Úniku.
Servisu ne’e hetan apoiu mós hosi Ministériu Transporte no Komunikasaun (MTK) tanba prosesu sira ne’e tomak presiza internet. Alende ne’e servisu hamutuk mós ho Programa Nasaun Unidas bá Dezenvolvimentu (PNUD) desde tinan 2023.
Repezentante PNUD, Katyna Argueta kongratula Governu tanba ho prezensa Balkaun Úniku ne’e bele reforsa liu-tán prestasaun servisu públiku bá sidadaun sira. Balkaun Úniku reprezenta etapa prátika ida bá administrasaun públiku ida ne’ebé efisiente, transparante no tau sidadaun nu’udár sentru.
PNUD komprometidu hodi servisu hamutuk ho Governu no povu Timor-Leste atu haforsa liután instituisaun, hadi'a servisu no apoia dezenvolvimentu sustentável iha munisípiu tomak.
Prezidente Autoridade Munisípiu Bobonaro, Paulo Moniz Maia agradese bá Governu no parseiru PNUD ne'ebé estabelese ona edifísiu ne'e.
Maski edifisíu ida-ne'e ki'ik, maibé ohin no aban bá oin sidadaun sira bele mai trata ona dokumentus iha-ne'e.
