PM Xanana inaugura edifisiu DMTC Lautem
Lautem, 16 Marsu 2026 - Primeiru-Ministru (PM), Kay Rala Xanana Gusmão akompaña hosi Ministru Transportes no Komunikasaun, Miguel Marques Gonçalves Manetelu, segunda ohin hala'o inaugurasaun bá edifísiu Diresaun Munisipál Transporte no Komunikasaun, iha postu administrativu Lospalos-Vila, Munisípiu Lautém.
Inaugurasaun ne'e halo iha ámbitu vizita Primeiru-Ministru Kay Rala Xanana Gusmão iha munisípiu Lautém hodi partisipa atividade "Haree besik servisu munisipál hosi rezultadu avaliasaun kondisaun mínima" ne'ebé realiza Gor Lospalos.
Ministru Transportes no Komunikasaun, Miguel Marques Gonçalves Manetelu iha nia diskursu esplika, antes ne'e iha edifísiu ki'ik ida hodi fasilita funsionáriu sira hala'o servisu liu-liu halibur reseita sira hosi servisu diresaun ne’e rasik.
Ministru Manetelu husu ba dirijente no funsionáriu sira ne’ebé servisu iha fatin ne’e atu kuidadu didiak hodi bele fó atendimentu ba komunidade sira ho dignu.
Nune’e mós Prezidente Autoridade Munisípiu Lautém, Mélio de Jesus lori povu Lautém nia naran agradese bá IX Governu Konstitusionál ne’ebé fó apoiu liu-hosi orsamentu Programa Dezenvolvimentu Integradu munisípiu hodi konstrui edifísiu ne'e.
Mélio de Jesus konsidera edifísiu ne’e importante tebes atu bele fasilita funsionáriu sira bele servisu hod di’ak liu tán liu-liu fó atendimentu bá povu.
Molok konstrui edifísiu bá diresaun ne'e rekolla ona reseita $123.000 liu-hosi rejistu motorizada no karreta iha munisípiu ne’e.
Partisipa iha serimónia inaugurasaun ne'e membru governu, membru Parlamentu Nasionál, Tenente Jenerál reformadu, Lere Anan Timur, Majór Jenerál João Miranda "Aluc Descartes", Majór Jenerál Cornélio Ximenes "Maunana" no intelektuál Lautém oan sira.
