Governu Timor-Leste agradese ba povu no governu Japaun nia apoiu ba konstruksaun terminal AIPNL.
Dili, 09 Fevereiru 2026 – Ministru Transportes no Komunikasaun, Eng. Miguel Marques Gonçalves Manetelu Segunda ohin, halo enkontru ho Xefe Reprezentante JICA iha Timor-Leste, Daisuke FUKUMORI iha sala Gabinete Ministru Kaikoli Dili.
Ministru Manetelu lori Governu Timor-Leste nia naran hakarak hato’o agradesimentu ba povu no governu Japaun nia apoiu ba iha konstruksaun terminál pasajeiru Aeroportu Internasional Prezidente Nicolau Lobato Comoro Dili.
“Uluk nanain, ha’u hakarak agradese ba governu Japaun no povu Japaun, liu-liu iha ba iha konstrusaun terminál pasajeiru aeroportu nian. Prosesu ne'e lori tempu naruk, maibé ikusmai ami hetan konkluzaun ida. Bazeia ba konvite, semana oin ha'u sei halo viajen ba Japaun hodi asina kontratu”dehan Ministru Manetelu.
Iha biban nemos governante ne’e hakarak agradese ba eis Xefe Reprezentante JICA Timor-Leste Ito Mempei no mós eis embaixadór Japaun Kimura Tetsuya, no ba sira-nia lideransa no mós embaixadór foun YAMAMOTO Yasushi. maske seida’uk hasoru malu ho embaixadór foun Japaun nia mai Timor-Leste, maibé fiar katak nia mós sei fó apoiu tomak ba prosesu sira-ne'e.
Xefe Reprezentante JICA iha Timor-Leste, Daisuke FUKUMORI agradese ba Ministru Manetelu nia lideransa hodi kontinua halo kooperasaun di'ak ho governu japaun liuhosi JICA nomos agradese bele konvida ona JICA hodi mai halo enkontru Antes halo viajen ba Japaun.
