Ministériu Transporte No Komunikasaun Kontinua Halo Revizaun Ba Oje 2026 Foka Liu Ba Jestaun Rekursu Umanu No Diplomasia Internasionál
Díli, 06 agostu 2025 — Enkontru ba loron da-ruak Ministériu Transporte no Komunikasaun kontinua halo diskusaun tékniku kona-ba revizaun ba aprezentasaun PowerPoint Orsamentu Anuál ne’ebé sei submete ba Komisaun Revizaun Orsamentu (KRO). Enkontru ne’e prezide husi Ministru Transporte no Komunikasaun, Eng. Miguel Marques Gonçalves Manetelu no involve Diretór Jerál sira, Diretór Nasionál sira, no Asesór sira Gabinete Ministru nian.
Aleinde halo akompañamentu kona-ba ajustamentu ba konteúdu aprezentasaun bazeia ba planu estratéjiku loron dahuluk nian, diskusaun sira iha loron da-ruak foka liu ba asuntu prinsipál tolu: alokasaun orsamentu ba tinan 2026, orsmantu adisional sira, inklui identifikasaun ba forsas traballu.
Iha okaziaun ne’e ko’alia mós kona-ba Timor-Leste nia adezaun no partisipasaun ativu iha organizasaun internasionál sira hanesan Universal Postal Union (UPU), Organizasaun Marítima Internasionál (IMO), no Organizasaun Internasionál ba Aviasaun Sivíl (ICAO). Iha fulan hirak oin mai, organizasaun sira ne’e sei hala’o eleisaun ba pozisaun xave sira, no Timor-Leste hanoin hela atu apoia kandidatu sira husi proposta ne’ebé simu ona husi nasaun amigo sira.
Antes remata enkontru Ministru Manetelu husu ba direjente sira atu iha kompromisu konjuntu kontinua hametin koordenasaun entre unidade sira, aliña estratéjia jestaun orsamentu nian ho nesesidade reál sira iha terrenu, no prepara enkuadramentu integradu ida ba planeamentu rekursu umanu no ajenda diplomasia téknika nian. Kompromisu ida-ne’e reflete Ministériu Transporte no Komunikasaun nia determinasaun atu hala’o nia funsaun servisu públiku ho forma profisionál, responsivu no orientadu ba rezultadu, enkuantu hametin Timor-Leste nia pozisaun iha nivel rejionál no globál.
