Ministériu Transporte No Komunikasaun Realiza Enkontru Revizaun Hodi Halo Aprezentasaun Orsamentu Anuál 2026 Antes Diskusaun Iha Komisaun Nasionál Revizaun Orsamentu
Díli, 05 agostu 2025 — Ministériu Transporte no Komunikasaun tersa ne’e realiza enkontru krusiál hodi halo revizaun ba ninia aprezentasaun kona-ba Orsamentu Anuál ne’ebé sei submete ba Komisaun Revizaun Orsamentu. Enkontru ne’e prezide husi Ministru Transporte no Komunikasaun, Eng. Miguel Marques Gonçalves Manetelu no hetan partisipasaun husi ofisiais seniór ministériu nian hotu, inklui Diretór Jerál, Diretór Nasionál, no Asesór Gabinete Ministru.
Enkontru ne’e foka liu ba diskusaun pontu xave balun iha dokumentu aprezentasaun orsamentu, ne’ebé presiza aliña ho diresaun estratéjiku ikus liu husi Ministru. Mudansa sira ne’e inklui ajusta prioridade despeza iha setór transporte no telekomunikasaun ba tinan fiskál 2026, inklui alokasaun orsamentu ba projetu estratéjiku sira hanesan hadi’a servisu transporte públiku, no habelar konetividade dijitál ba área remota sira.
Iha nia diskursu, Ministru subliña importánsia atu prepara dokumentu aprezentasaun ida ne’ebé loos, transparente, no tuir polítika nasionál ne’ebé Governu estabelese ona. Husu mós atu unidade téknika hotu-hotu garante katak dadus no narrativa iha aprezentasaun aliña ho Planu Asaun Estratéjiku Ministériu nian no apoia vizaun dezenvolvimentu nasionál ba médiu prazu.
“Aprezentasaun ne’e la’ós de’it relatóriu númeru sira, maibé mós forma ida ba responsabilizasaun públika no oportunidade ida atu hatudu ita-nia kompromisu ba efisiénsia, responsabilidade, no atendimentu públiku,” Tenik Ministru Manetelu.
Prosesu revizaun ne'e partisipativu, ho lider unidade tékniku ida-idak hodi hetan oportunidade atu fó hanoin no klarifikasaun. Ekipa tékniku ne’ebé responsavel ba preparasaun aprezentasaun sei halo akompañamentu ba rezultadu enkontru ne’e, hodi finaliza dokumentu ne’e molok ofisialmente submete ba Komisaun Revizaun Finanseira iha tempu badak.
Enkontru ne’e reflete kompromisu Ministériu nian atu garante katak prosesu planeamentu no orsamentu hala’o ho profisionál, tuir alvu, hodi belerespondeba nesesidade dezenvolvimentu nasionál, partikularmente iha setór transporte no komunikasaun.
