Ministru Manetelu Fó Ona Orientasaun Ba ANATL Atu Halo Kontrolu Ba Taxi sira ne’ebé halo Operasaun Iha Aeroportu Internasional Prezidente Nicolau Lobato.
Dili, 04 Agostu 2025 – Ministériu Transporte no Komunikasaun realiza serimónia isár bandeira semana da-huluk fulan agostu tinan ne’e iha resintu edifisiu minsitériu Kaikoli Dili.
Atividade ne’e rutina halao kada fulan, liuhosi atividade ne’e atu hametin espérito nasionalismu no patriotism funsionáriu sira ba rai doben Timor-Leste.
Inspetór ba serimónia ne’e mak atúal Ministru Transporte no Komunikasaun, Eng. Miguel Marques Gonçalves Manetelu.
Iha nia diskursu Ministru Manetelu ba funsionáriu sira hatete oras ne’e dadaun públiku preokupa tebes ho taxi sira ne’ebé halo operasaun iha aeroportu internasional prezidente nicolau lobato, kona-ba presu ne’ebé motorista sira fó ba pasajeiru sira la razoavél tanba ne’e Ministru Manetelu orienta ona ANATL atu hare ba kestaun ida ne’e, tanba konsidera presu ne’ebé motorista sira hasae la razoavél tebes hare ba kondisaun kareta sira ne’ebé mak la permite halo operasaun, taxi sira ne’e maioria kondisaun ladiak ona.
Governante fó hanoin fila fali ba ANTL atu hare ba kestaun hirak ne’e tanba ho atitidu motorista sira iha aeroportu fó imajen ladiak ba Timor-Leste tanba aeroportu internasional Prezidente Nicolau Lobato nu’udar odomatan boot Timor-Leste nia. Ho nune’e fó impaktu ladiak ba ema estranjeiru sira ne’ebé hakarak mai vizita Timor-Leste.
Enkuantu isár bandeira fulan ne’e resposabél husi APORTIL.
