Prezidente ANATL Ho Diretor Ezekutívu FDCH Halo Termu Entrega Graduadus Sira Ba Iha Vogal I Diresaun Servisu Aeroportuáriu No Vogal Ii Servisu Trafego Aéreo Navegação
Dili, 15 Setembru 2026 – Ministru Transportes no Komunikasaun, Eng Miguel Marques Gonçalves Manetelu tersa ne’e sai sasin ba iha serimónia termu entrega graduadu nain sanulu resin lima ne’ebe remata ona sira nia estudu iha indonézia ba iha iha Vogal I Diresaun Servisu Aeroportuáriu (DSA) no Vogal II Servisu Trafego Aéreo Navegação (STAN)
Termu entrega ne’e halao iha edifisiu ANATL Komoro Dili, objetivu husi serimónia ne’e Atu asegura prosesu administrativu, graduadu Timoroan na’in sanolu resin lima (15) kompostu husi na’in sanolu resin tolu (13) nu’udar bolseirus ANATL FDCH, iha Nível Diploma III (D3) na’in sanolu (10), no na’in tolu (3) kontinuasaun ba Nível Diploma IV (D4) husi Air Traffic Controller (ATC), no na’in rua (2) seluk fasilita husi ANATL ba Nível Diploma III (D3), maibe finansia selu rasik husi familia inan aman, hodi ba hala’o ona estudu durante tinan tolu (3) no remata ona sira nia estudu, no simu ona graduasaun iha fulan kotuk, iha Sekolah Politéknik Penerbangan Indonesia Curug, Surabaya no Palembang, ba área espesífiku aeroportu nian.
ANATL Implementa Programa Bolsu Estudu ba dezenvolvimentu rekursu umanu no formasaun profesional iha area aviasaun sivíl inklui formasaun iha nivél diploma III no diploma IV, estudante sira ne’e Remata ona sira nia estudu iha akademia aviasaun sivíl iha Indonézia, programa bolsu estudu bazeia ba kontratu estudu no termu kompromisiu ne’ebé selebra entre ANATL, FDCH, bolseiru no inan aman.
Reprezenta bolseiru Isabel Fatima de Jesus hatete atu hetan susesu persija sakrifisiu ne’ebé boot hodi atinji metas no objetivu.
“laiha dalan ba susesu ida maka fasil, buat hotu persija sakrifisiu oi-oin hodi ita bele manan too iha pontu susesu, jornada estudu ne’ebé ami ultrapassa no simu graduasaun iha fulan agostu tinan 2026 sai hanesan momentu siknifikativu ba ami nia vitoria husi ami nia sakrifisiu rasik, husi esforsu sira ne’e hotu sai hanesan esperensia ida mai ami, hodi ami aprende liutan kona-ba responsabilidade disiplina no forma ami nia karater privadu husi loron ba loron nia atu sai ema nebe diak no obidiente, kreativu no sai privadu nebe mka bele iha benefisiu iha enviromentu ne'ebé mak ami hamahan an ba” dehan bolseiru Isabel Fatima de Jesus.
Diretór FDCH, Julio Aparicio subliña katak ema (kapitál umanu) mak sai xave no fundasaun prinsipál ba dezenvolvimentu. Se la kria rekursu umanus ne'ebé kualifikadu, matenek no ijijente, dezenvolvimentu fíziku ne'ebé ho folin karu no boot sei la lori benefísiu ne'ebé maximu ba sosiedade no nasaun.
"Deznvolvimentu labele hahú husi sasan maibé dezenvolviementu tenki hahú husi ema tanba ema mak hun no abut ba riku soin hotu-hotu kuandu ema la matenek o nia programa bele diak bele too iha ne’ebé too lalehan nunka bele hetan tanba ita nia rekursu umanus laiha tanba ne’e bainhira hau tama iha FDCH ha'u iha prinsipiu ida tanba ha'u hatane katak ita nia rekursu umanus iha timor sei menus tebes tanba ne’e persija halo kapasitasaun ba ita nia ema sira''' subliña Julio Aparicio
Ministru Manetelu liuhosi okaziaun husu ba graduadu sira atu hatudu disiplina no aplika siensia sira ne'ebé hetan husi universidade hodi mai dezenvolve Timor-Leste liuhosi setór aviasaun sivíl.
"Ita tenki fó onra ba martires da pátria sira tanba sira nia mate mak ita bele tur iha ambiente ida hanesan ohin kalan, sira nia luta husik hela ba ita rai ida naran timor leste nebe mak sai ita nia responsabilidade oinsa mak atu dezenvolve rai ida ne’e ho povu sira para atu bele moris diak ida ne’e ita nia responsabilidade tanba nemak iha imi nia kabaas koñesimentu sira ne’ebé imi hetan, siensia ne’ebé imi aprende imi tenki aplika ho responsabilidade, disiplina no integridade, ita bele matenek maibé laiha integridade ita laiha valór, imi nia disiplina tenki hadaet ba timor oan sira ne’ebé maka lahetan oportunidade ba eskola hanesan imi"hatete Ministru Manetelu.
Ministru Manetelu Sente onradu Lori governu da sia nia naran hato'o apresisaun no parabéns ba graduadu sira nomos ba inan aman sira tantu ANATL, E.P no FDCH.
Governante ne'e enfatiza katak susesu la mai ho buat fasil. Graduasaun la’ós faze ikus, maibé hahú husi jornada foun iha karreira no moris. Tenki orgullu no agradese ba Maromak, família no ema hotu ne’ebé fó apoiu, no ohin loron graduadu sira bele fila mai atu kontribui ba dezenvolvimentu Timor-Leste, liuliu iha setor aviasaun sivil.
