TL-Kamboja lansa plataforma verify.gov.tl
Dili, 01 Juñu 2026 – Governu Timor-Leste liuhusi Ministériu Transportes no Komunikasaun (MTK) hamutuk ho Governu Kamboja liuhosi Ministériu Postais no Telekomunikasaun ofisialmente lansa ona plataforma nasionál foun verify.gov.tl. Lansamentu ne'e hanesan pasu boot ida ba transformasaun dijitál hodi hametin seguransa, transparénsia, no mós hapara falsifikasaun dokumentu ofisiál sira iha rai-laran.
Plataforma ne'e dezenvolve ho susesu boot liuhusi kooperasaun bilaterál no asisténsia téknika husi Governu Kamboja (bazeia ba sira-nia esperiénsia ho verify.gov.kh), ne'ebé uza teknolojia avansadu Blockchain ho kódigu QR.
Ponto Xave husi Plataforma Foun Ne'e:
• Fokus Primeiru ba Karta Kondusaun (SIM): Karta kondusaun sai hanesan dokumentu ofisiál dahuluk ne'ebé implementa kódigu QR Ho kódigu ne'e, autoridade sira (liuliu PNTL ho DNTT) ka sidadaun ruma bele scan uza telemóvel de'it hodi verifika kedas motorista nia identidade orijinál no deteta mós kualker dokumentu falsu.
• Seguransa Blockchain: Tanba uza baze blockchain, dadus sira-ne'e protejidu tebes. Só ministériu transportes no komunikasaun liuhosi diresaun nasionál transporte Terrestre maka kompetente no na'in ba dokumentu ne'e de'it mak bele asesu no verifika, hodi garante duni katak dokumentu ne'e orijinál no autentiku.
• Planu ba Oin: Governu iha ona vizaun katak kódigu QR no plataforma ne'e sei uja mós ba dokumentu importante sira seluk iha futuru.
S.E. Ministru Transportes no Komunikasaun, Eng Miguel Marques Gonçalves Manetelu iha -nia entrevista ba jornalista sira hatete lansamentu Plataforma verify.gov.tl ne’e bele realiza tanba hetan apoiu husi governu kamboja.
“verify.gov.tl, Plataforma ida ne’ebé harii bazeia ba memorandum ne’ebé asina akordu iha 20 janeiru 2025 iha kamboja, iha marsu ekipa tékniku mai kedan halo asesmentu ida ba ita nia diresaun nasional transportes terestre oinsa atu bele aplika uluk verify iha karta kondusaun, hahú husi marsu 2025 ne’e sira hahú servisu ne’e konklui kuaze iha novembru sira ne’e. ohin mak ita iha oportunidade lansa Plataforma ida ne’e. uja QR code ida ba karta kondusaun e depois dokumentus ne’e atu asegura nia orijinalidade, seguransa depois ema ida kaer karta kondusaun ne’e. dalaruma bele falsu mais iha ne’e QR code iha polisia ruma prende mak nia uja telephone uja QR code nia bele iha informasaun ema ne’e los ka lae nia mak nain ba karta kondusaun ne’e ka lae. Ba oin karta kondusaun ne’ebé data mate ona ka expire sei troka hotu uja karta kondusaun foun ho QR code. Kualker karta kondusaun ba oin atu provizóriu ka permanente iha ona QR Code, atu asegura katak karta kondusaun ne’e ema nain duni mak kaer karta kondusaun ne’e. ba oin sei aplika ba dokumentu sira seluk" dehan Ministru Manetelu ba jornalista sira iha salaun multiuzo GMN Bebora Dili.
Nune’emós tuir S.E. Ministru Postais no Telekomunikasaun, Chea Vandeth iha nia entrevista ba jornaslista sira nia esplika Plataforma ida ne’e úniku tebes nune’e sira koopera ho tékniku sira husi kamboja hodi harii Plataforma ida ne’e.
“Antes ne’e ami harii Plataforma ida ne’e laiha dadus, ami foti dadus sira husi ministériu transportes no komunikasaun sira nia servidór (server) no ikus mai finaliza Plataforma ida ne’e, bainhira nain ba karta kondusaun ka induvidu sira hakarak hatene uja sira nia dadus rasik, sira bele verifika liuhosi Plataforma ida ne’e ho nune’e dadus sira ne’e mak sai dokumentu ida ba sira” dehan Ministru Postais no Telekomunikasaun, Chea Vandeth ba jornalista sira iha salaun multiuzu GMN Bebora Dili.
Nia afirma laiha ema ida maka bele haree dadus eseptu ministériu transportes no komunikasaun liuhosi diresaun nasionál transporte Terrestre (DNTT), plataforma ida-ne’e aplika iha Kamboja mós. plataforma blockchain ida-ne'e útil tebes atu asegura katak dokumentu hotu-hotu auténtiku. plataforma ne’e hetan rekoñesimentu husi Ministru Dijitál ASEAN plataforma ida-ne'e mós rekoñese iha mundu tomak.
