Ministério dos Transportes e Comunicações

Dili, 06 Juñu 2025 - Ministru Transporte no Komunikasaun Eng. Miguel Marques Gonçalves Manetelu, akompaña husi Vise PM no Ministru Koordenador Ekonomia no Ministru Turizmu no Ambiente, Francisco Kalbuady Lay, no Embaixadór Malázia iha Timor-Leste, Amarjit Singh, partisipa lansamentu voo direta Batik Air husi Malázia mai Timor-Leste iha Aeroportu Internasional Prezidente Nicolau Lobato Comoro Dili.

Iha lansamentu ne’e Ministru Manetelu iha nia diskursu hatete onra boot no momentu orgullu reprezenta Governu Timor-Leste, hodi simu inaugurasaun aviaun Batik Air husi Kuala Lumpur mai Dili, Timor-Leste.

Ohin, la'ós de'it loron ne’ebé ita simu aviaun ida to'o mai ita nia rain ba dala-uluk – maibé ida ne’e momentu markante ida ne’ebé simboliza pontes foun ida ne’ebé liga entre nasaun rua (Timor-Leste no Malázia). Ligasaun direta ida-ne'e hanesan momentu ida-ne'ebé ita hein ba tempu naruk, ne'ebé simboliza amizade ida forte, habelar kooperasaun, no kompromisu ba konetividade no dezenvolvimentu nian. Tamba ne’e, Ministru Manetelu hakarak governu nia apresiasaun kle'an ba Governu Malazia, ba parseria no kontinuasaun apoiu ba Timor-Leste, liu-liu iha konetividade aérea no ba envolvimentu rejionál nian.

Representante Diretor Ezekutivu Batik Air Datuk Chandran Rama Muhy, liu hosi Head Marketing Bavani Veeriah iha nia diskursu hateten kompaña aviasaun Malázia nia istória dahuluk ne’ebé opera vó entre kapitál rua ne’e, Batik Air nia chegada inaugural marka istoria ne'ebe signifikante ida iha konektividade internasional ho Timor-Leste.

Voo direta entre Kuala Lumpur ho Dili, la'ós deit ligasaun transporte nian, ne'e hanesan portaun ba oportunidade. Ida ne'e reflete kompromisu Timor-Leste nian ne’ebé la'ós de'it atu fó avansu relasaun bilaterál entre Timor-Leste ho Malazia, maibé mós atu habelar kooperasaun rejionál no internasionál iha transporte aéreu, turizmu, komérsiu, investimentu, kultura no importante liu, relasaun entre povu ho povu. Ba Timor-Leste, konetividade aérae sai nu'udar motór ba transformasaun ekonómika no sosiál. Ida ne'e liga Timor-Leste nia emprendendorizmu no emprezáriu sira, simu vizitante no turista sira, no lori família no komunidade sira besik malu liu tan. Ida ne’e mos sei kria empregu, loke merkadu foun, no hametin lasu diplomátika entre rai rua ne’e nian. 

eventu inaugurasaun ida-ne'e, espera ida ne’e hanesan inísiu ida ba voo sira ne’ebé sei mai barak barak liu tan, movimentu sei barak liu tan, no ba oin. Governu Timor-Leste iha kompromisu atu asegura katak, rute ida-ne'e, no mós rute sira seluk ne’ebé sei mai, sei funsiona ho di'ak no sustentavel. Autoridade Aviasaun Sivíl, Administrasaun Aeroportu no parseiru sira iha servisu aviasaun sira, sei fo apoiu tomak ne’ebé Batik Air sei persiza. 

Lansamentu ne'e partisipa husi Korpu Diplomatiku no Prezidente ANATL no entidade relevante sira.