Embaixadór Kimura Tetsuya hamutuk ho Empreza Fábrika Ró Tsuneishi Timor ShipBuilding, Unipessoal Atualiza Progresu Servisu ba Ministru Manetelu
Dili, 3 Juñu 2025 – Embaixadór Japaun iha Timor-Leste, Kimura Tetsuya hamutuk ho estrutura husi Empreza Fábrika Ro, Tsuneishi Timor Shipbuilding, Unipessoal, Lda halao enkontru ho Ministru Transporte no Komunikasaun Eng. Miguel Marques Gonçalves Manetelu iha nia servisu fatin Kaikoli Dili.
Iha enkontru ne’e aprezenta progresu serbisu ne'ebé lao dadaun no husu apoiu husi Ministru hodi hadi'a liután sira-nia servisu.
Embaixadór Kimura Tetsuya no reprezentante empreza kontente no hato’o agradesimentu wa’in ba Ministru Manetelu tanba sira simu ona apoiu másimu husi Ministru durante hala’o sira nia serbisu iha Timor-Leste, no mós ba apoio sira ba futuru.
Governante ne’e apresia ba serbisu di’ak ne’ebé empreza halo ona, no kompromete atu apoio nafatin sira, tanba serbisu refere ajuda dezenvolvimentu setór transporte maritimu iha Timor-Leste.
Empreza refere fó ona oportunidade empregu ba joven Timor-oan barak iha rai laran, no mós haruka ona balun ba tuir treinamentu espesializadu iha rai li'ur. Dadaun ne'e, sira sei nafatin serbisu realiza sira-nia vizaun halo fábrika hodi produz iha Timor-Leste.
