Kompañia Karya Timor-Leste, muda ona jerador husi power house ezistente ba Temporary Power House.
Díli, 05 Agosto 2026 - Ekipa manutensaun ANATL koordena ho Kompañia Karya Timor-Leste, muda tiha ona jeradór eletresidade ho kapasidade 1.500 KVA no 500 KVA husi Power House Ezistente iha edifísiu manutensaun, ba Power House Temporary (TPH1).
Jeradór rua nemak durante ne’e sai rezervadu hodi fornese Liña eletresidade ba servisu operasionalizasaun aeroportu Dili, bainhira Liña eletresidade públiku EDTL mate.
Ekipa servisu ne’ebé lideradu husi Xefe Manutensaun Juvinal Soares, akompaña mós husi Vogál (I) Stand Luis Alves, no Vogál (II) Servisu Aeroportuáriu Marco de Sousa, muda ekipamentus elétriku refere husi edifísiu Power Station ezistente ba Powerhouse temporary, haree ba ezijensia prosesu servisu konstrusaun terminal pasajeirus foun aeroportu (IPNL) Díli ne’ebé kompañia TOA COORPORATION hahú alarga servisu ba ona área edifísiu manutensaun power house.
Jerador hirak ne’e mak sei garante fornesimentu liña eletricidade másimu oras rua nolu resin haat (24) ba funsionamentu operasaun servisu, iha Aeroportu Internasionál Prezidente Nicolau Lobato (AIPNL) Komoro Díli.
