DNIK Halo Instalasaun Kabu Fibra Ótika Rai Okos Iha Kuluhun
Dili, 29 Jullu 2026 - Diretór Diresaun Nasionál Infraestrutura Komunikasaun (DNIC), Ministériu Transportes no Komunikasaun (MTC) Pedro Amaral, halo observasaun direta ba progresu serbisu instalasaun kabu fibra ótika rai okos iha área Kuluhun, Díli, hodi asegura katak implementasaun projetu ne'e lao tuir padraun tékniku, qualidade no seguransa ne'ebé estabelese ona.
Observasaun direta ne'e reflete kompromisu lideransa DNIC-MTC atu monitoriza no garante katak infraestrutura telekomunikasaun nasional dezenvolve ho efisiénsia, transparénsia no responsabilidade. Durante vizita ne'e, Diretor DNIC-MTC ko'alia ho ekipa tékniku sira kona-ba progresu obra, metodu instalasaun, no medida seguransa ne'ebé aplika durante serbisu iha terrenu.
Instalasaun kabu fibra ótika underground nu'udar parte husi esforsu Governu Timor-Leste atu moderniza infraestrutura komunikasaun nasional no hasa'e kapasidade rede internet no intranet iha rai-laran. Sistema kabu iha rai okos sei fó vantajen boot liu tanba bele minimiza risku estragus husi kondisaun klimátika, asidente no interferénsia externa, hodi garante servisu komunikasaun ne'ebé estável no sustentável ba tempu naruk.
Ekipa tékniku DNIC-MTC kontinua hala'o serbisu tuir padraun enjenharia no prosedimentu seguransa atu asegura instalasaun hotu remata ho qualidade aas. Serbisu ida-ne'e mós sei sai fundamentu importante ba expansaun rede fibra ótika nasional no suporta transformasaun dijitál Timor-Leste.
Diretor DNIC-MTC reafirma katak monitorizasaun direta ba projetu estratéjiku sira sei kontinua hodi garante implementasaun ne'ebé efisiente, pontual no tuir objetivu Governu atu hadi'a asesu ba servisu internet no komunikasaun dijitál ba komunidade no instituisaun públika sira iha nasaun tomak.
Instalasaun kabu fibra ótika underground iha Kuluhun hatudu Governu nia determinasaun atu investe iha infraestrutura dijitál moderna, hametin konektividade nasional no suporta dezenvolvimentu sosiol ekonómiku Timor-Leste liu husi teknolojia komunikasaun ne'ebé avansadu.
