Timor-Leste Reafirma Apoia Ba Hametin ASEAN-US Iha Kooperasaun Dijitál
Han Noi, Viet Nam, 16 Janeiru 2026 – Enkontru Ministru Digitál ASEAN ba dala 6 iha Viet Nam, Governu Timor-Leste hato’o apresiasaun ba Estadus Unidus ba nia parseria ne’ebé kontinua.
Nu’udar Estadu Membru ASEAN ba dala 11, Timor-Leste aliña-an ho Vizaun Komunidade ASEAN 2045 no iha kompromisu atu avansa komunidade dijitál ASEAN ida ne’ebé inkluzivu, reziliente, no prontu ba futuru.
“Ami nota rezultadu sira hosi ADGSOM+U.S. ba dala 5. no simu ho laran-haksolok proposta atu estende Planu Serbisu Dijitál U.S.-ASEAN nian to'o 2026, hodi mantein área kooperasaun prioridade neen. Kontinuidade ida-ne'e suporta estabilidade rejionál no transformasaun dijitál.
Timor-Leste partikularmente valoriza foku ba konetividade dijitál, siberseguransa, no kapasitasaun. Hirak-ne'e esensiál ba ekonomia dijitál emerjente sira hanesan ita-nian. Ami hein atu envolve iha inisiativa sira relasiona ho infraestrutura kabu sub-mariñu iha tasi okos, reziliénsia siberseguransa, no dezenvolvimentu abilidade dijitál inkluzivu, ne'ebé sei ajuda taka divizaun dijitál iha ASEAN nia laran”dehan Ministru Manetelu iha nia intervensaun iha enkontru entre Ministru Digitál ASEAN ho delehasaun husi Estadu Unidus Amerika.
Timor-Leste reafirma apoiu ba hametin ASEAN-U.S. kooperasaun dijitál no prontu atu kontribui ho signifikativu ba implementasaun Planu Serbisu nian, hodi asegura katak laiha estadu membru ida maka husik hela iha kotuk.
