Konsellu Ministru Altera no Aprova Dekretu Lei Governu
Ministério dos Transportes e Comunicações: Loron Kuarta-Feira, 06/09/2023, Ministru Transporte no Komunikasaun, Eng. Miguel Marques Gonçalves Manetelu, partisipa reuniaun Konsellu Ministrus, hodi aprova projetu alterasaun dekretu lei ne’ebé aprezenta husi Ministeriu Finansa (MF), no projetu dekretu lei organíka Sekretáriu Estadu Igualidade (SEI).
Prejensa Ministru Transporte no Komunikasaun, Eng. Miguel Marques Gonçalves, ho membru Governu da-IX, dala uluk aprova ona projetu Dekretu Governu, ne’ebé aprezenta hosi Ministra Finansas, Santina José Rodrigues F. Viegas Cardoso, kona-ba aliterasaun dahuluk ba Dekretu Governu n. 19/2022, loron 11 Fulan Maiu, relasiona ho klasifikadores orsamentais.
Nune’e fasilita komprensaun ba klasifikasaun foun hosi reseitas no despezas públikas, ne’ebé ho objetivu atu agrupa kategoria sira iha grupu lima nivel primeiru nian ne’ebé korrespondente ho kategoria anteriór sira, hodi transforma kategoria sira ne’ebé iha daudaun ne’e sai sub-kategoria, hodi halo klasifikasaun ekonómika despezas nian sai nivel haat. Aproveita hodi halo mós detallu ba sub-kategoria operasional estraorsamentais nian, no mós halo korresaun uitoan ba klasifikasaun.
Enkuantu husi reuniaun Konsellu Ministru, membru governu sira aprova mós projetu Dekretu-Lei, ne’ebé aprezenta husi Ministru Prezidénsia Konsellu Ministrus, Agio Pereira no husi Sekretária Estadu, Elvina de Sousa Carvalho, ne’ebé aprova Orgánika Sekretaria Estadu Igualdade nian.
Aprovasaun ne’e fó ona kompetensia ba Sekretaria Estadu Igualdade inklui servisu lubun ne’ebé apoia Sekretária Estadu Igualdade iha ezersísiu ba ninia kompeténsia sira, liuliu iha promosaun igualdade jéneru iha leis, polítikas públikas, planu estratéjiku no operasionál, programa governamentál sira no iha Orsamentu Jerál Estadu, iha sensibilizasaun públiku ba kestaun sira igualdade jéneru no inkluzaun, eliminasaun diskriminasaun no violénsia kontra feto no labarik no promosaun ba partisipasaun fetu sira iha vida polítika no sosiu-ekonómika nasionál. (MEDIA MTK)
