
Tinan oin Governu sei troka Xapa Matrikula tuir kodigu Munisípiu
Ministériu Transporte no Komunikasaun realiza serimónia isár bandeira semana dahuluk fulan Jullu.
Iha serimónia ne’e, Ministru Transporte no Komunikasaun Eng. Miguel Marques Gonçalves Manetelu sai hanesan inspetór serimónia.
Perante Kargu Xefia sira husi Ministériu, Ajente Autonoma sira, Ministru Manetelu hatete tinan oin sei troka Xapa Matrikula sira
ne’ebé mak oras ne’e dadaun uja hela ba iha transporte sira.
“Ha’u mós aprova ona diploma ministerial ida kona-ba xapa, hahú tinan oin xapa sira ne’e troka hotu kedas, tanba xapa hahú kode ida kada munisípiu para bele identifika kareta ka motorizada mai husi ne’ebé para dezastre ruma iha buat ruma ita hatene katak kareta ne’e mai husi Bobonaro, Covalima etc. Diploma ne’e ha’u asina ona hamutuk ho DNTT, ami hare katak implementasaun ne’e tinan oin” hatete Ministru Manetelu iha serimónia isár bandeira iha resintu MTK.
Ministru Manetelu husu ba DNTT atu kontinua halo sosializasaun ba komunidade sira kona-ba sonoru sira ne’ebé mak DNTT monta tiha ona iha kapitál Dili, ho nune’e ema bele komprende no uja ho diak selae sonoru sira ne’ebé DNTT monta saugati de’it. DNTT tenki halo sosializasaun liuhosi televizaun no media sosiál sira, ho nune’e motorista sira bele kumpri regras sira ne'e.