Ministério dos Transportes e Comunicações

Ermera, 26 Janeiru 2026 – Primeiru-Ministru Kay Rala Xanana Gusmão akompaña hosi Ministru Obras Públika, Samuel Marcál, Ministru Transportes no Komunikasaun, Eng. Miguel Marques Gonçalves Manetelu, hamutuk ho membru governu balu, Segunda ohin lansa fatuk da-huluk no serimónia asina kontratu Estrada Nasional Gleno no Gleno-Letefoho iha suku Eraulu Munisípiu Ermera.

Povu munisípiu ermera simu komitiva Primeiru-Ministru Kay Rala Xanana Gusmão,ho serimónia tradisional tuir kultura munisípiu ermera nia.

Durante Tinan barak ona mak povu ermera ejiji ba governu atu hadia Estrada hirak ne’e bainhira tempu udan difikulta tebes ba iha movimentu transporte públiku no privadu sira.

Ohin governu ofisialmente lansa fatuk dahuluk no halo serimónia asinatura, ne’ebé asisti husi komunidade munisípiu ermera, marka mós prezensa husi diretór ezkutivu Banku Mundiál Timor-Leste, David Freedman, no entidade estadu sira seluk.

Rehabilitasaun Estrada Letefoho  ho Gleno ho distansia (30+230) Gleno ho distansia (Km 54+370) kontraktór husi China Civil Engineering Construction Corporation ho durasaun loron 365,  no Estrada urbana Gleno  ho durasaun tinan ida kontratór hosi Shabryca Construction UNIP.LDA. 

Xefe governu iha nia diskursu husu timor-oan tenki hamutuk hodi dezenvolve rai doben Timor-Leste 

“Maiu tinan ne’e ita selebra tinan 24 la’os deit iha ermera iha fatin barak mak sei halerik ba iha infraestrutura baziku, ita tenki kuriji an tinan 24 ita halo saida ona hodi nune’e ha’u ejiji ba membru governu sira ho imi hotu too xefe suku sira no xefe aldeia sira ita servis laos atu simu de’it osan, maibé  servi atu hadomi liu rai ida ne’e, hadomi liu povu ida ne’e, povu la konsistente simu terus oi-oin ba ukun an, ita sei la ukun an, la fó an ba mate hodi hetan ukun an ita laiha fundu petroleum.  Ba oin ita tenki hamutuk, hanoin dalan ne’’bé di’ak liu tanba nemak 2026 ha’u sei lao haleu teritóriu Timor laran tomak hanesan iha tinan 2010, ko’alia ho intelektual matenek oan sira, joven sira, imi bele ka lae simu governu lokál no dezenvolve imi nia munisípiu liu-liu munisípiu ermera” PM Xanana Husu.

Iha sorin seluk Prezidente Autoridade Munisípiu Ermera José Martinho dos Santos Soares agradese ba entidade hotu-hotu nia kontribuisaun ohin realiza duni mehi povu ermera nia kona-ba Estrada.

“Tanba ne’e ha’u hakarak agradese ba joven sira, ferik katuas no entidade hotu iha munisípiu ermera saida mak imi hein, saida mak  imi ejiji ba governu no ba autoridade lokál maske la’os ha’u nia kna’ar maibé ohin termina ona, hahú ohin ba oin ita sei despede ona tahu dodok, atu fasilita komunidade ermera, benefisiariu husi estrada ida ne’e hahú husi postu administrativu lima kompostu husi atsabe, letefoho, hatulia zona a,b no ermera villaho total abitante rihun atus ida lima nulu resin haat” PAM Ermera José Martinho agradese.

Impaktu Pozitivu hosi Projetu ne'e.

Reabilitasaun ne’e fó benefísiu boot ba komunidade tanba:

1. Asesu Merkadu: Fasilita transporte kafé hosi Letefoho ba Gleno no Dili ho kusto ne'ebé baratu liu no tempu ne'ebé lalais.
2. Seguransa: Redús risku asidente iha dalan ne'ebé uluk aat tebes, liuliu iha tempu udan ne'ebé rai monu barak.
3. Ekonomia Lokál: Mobilidade komunidade nian aumenta, ne'ebé bele lori dezenvolvimentu ba negósiu ki'ik sira.
4. Estétika Urbana Gleno no Letefoho ne'ebé di'ak sei fó imajen kapás ba kapitál munisípiu nian.