Timor-Leste Apoia Planu Asaun Asean-Xina Ba Harii Ekosistema Dijitál Sustentável No Inkluzivu (2026–2030).
Ha Noi, Viet Nam, 16, Janeiru 2026 - Ministru Transportes no Komunikasaun, Eng. Miguel Marques Gonçalves Manetelu lori governu Timor-Leste nia naran hato’o pozisaun governu Timor-Leste nia naran iha enkontru ADGMIN ba dala neen iha Ha Noi Viet Nam, hodi fó apoiu Planu Asaun ASEAN-Xina ba Harii Ekosistema Dijitál Sustentável no Inkluzivu (2026–2030).
Timor-Leste, nu’udar Estadu Membru ASEAN ba dala 11, iha kompromisu ba ASEAN dijitál ida ne’ebé inkluzivu, reziliente, no haree ba oin.
“Ami simu ho laran-haksolok progresu ne'ebé reflete iha rezultadu sira hosi ADGSOM+Xina ba dala 5 no ADGMIN+Xina ba dala 5, no mós implementasaun hosi Planu Serbisu Dijitál ASEAN-Xina 2025 nian. Esforsu sira-ne'e aliña ho ami nia prioridade nasionál sira iha infraestrutura dijitál, seguransa, no kapasitasaun’’Tenik Ministru Manetelu.
“Ami partikularmente apoia Planu Asaun ASEAN-Xina ba Harii Ekosistema Dijitál Sustentável no Inkluzivu (2026–2030). Ninia pilar sira—husi infraestrutura dijitál no kooperasaun IA nian ba siberseguransa no kreximentu inkluzivu—fornese dalan ida ne'ebé klaru ba kolaborasaun rejionál”Tenik Ministru Manetelu.
Timor-Leste mós apoia estabelesimentu Sentru Inovasaun Indústria AI Xina-ASEAN no Akademia Dijitál Xina-ASEAN. Inisiativa sira ne’e sei hametin inovasaun rejionál, dezenvolvimentu talentu, no governasaun dijitál—área sira ne’ebé Timor-Leste buka atu aprende no kontribui.
Timor-Leste hein atu envolve iha Planu Serbisu Dijitál 2026 no kolabora iha projetu sira ne'ebé maka taka divizaun dijitál sira, hasa'e siberseguransa, no promove dijitalizasaun sustentável. Timor-Leste prontu atu servisu hamutuk ho Estadu-membru hotu-hotu no Xina hodi implementa enkuadramentu sira-ne’e ba ita-nia povu no rejiaun nia di’ak.
